在股市世界，久不久就會有神話出現，例如一些神仙股，短期內以倍數上升，令買中的人發夢一樣。又例如好似4月初那個神話升市，只要買落去，可能三幾日就升兩三成。不過好景不常，神話話咁快已經破滅，大家又跌返落人間，更差的甚至已經去左地獄一樣。
至於足球世界，神話亦偶有出現，講到呢度，大家都知我想講李斯特城吧！遠至上年季中打後，李城依然排在榜末位置，甚至跟第17位有一段距離，當時我自己覺得降班穩膽非李城莫屬; 然而神話就在當時開始，球隊好似食左偉哥一樣，遇神殺神，進攻吓吓一針見血，赢到你唔信，最後竟在中游位置過終點，跌到一地眼鏡，但原來只係神話既開始。
在今季開季前，領隊位置換上了曾經執教車仔的“ 暈未呀你"，據說上任領隊不滿球隊能從降班邊緣逃出生天後，老闆仍不願意開水喉買人，故此一怒之下遞信走人。
踏入今季，很多人包括小弟仍不相信李城可以延續上季尾的神話，但另一個神話華D卻同時出現了，今季他的火熱狀態到目前為止從未底落過，其飛快的速度令等閒後衛只能食塵，睇住佢入波，還有連續場場入波的走勢到最近才打破，但只停了一場後又繼續有波入，如果今季最終成為神射手，便會成為繼十幾年前Philips之後另一個“弱"隊神射手了(李斯特城仲算唔算弱隊？)。
其拍擋馬列斯今季又突然爆起，他亦是速度高，有技術而且十分靈活的球員，據聞多間大會已經睇中佢，出走只是時間問題。反而華D呢類高速前鋒，以歷史上看應該不會延續太久，很多時一兩年就見底，市場價值不及馬列斯。
究竟李斯特城神話可以延續到幾時？相信雲尼亞里已經擔心緊，因為轉會市場即將重開，只要兩人其中一個被搶走，我相信其神話好大機會立即破滅，因為球隊進攻太倚重此兩子，缺一不可，大家可放長雙眼睇吓一月份會有什麼變化吧！
除了李斯，另一個神話静俏俏地已露出頭來，大家可看看屈福特射手恩哈路，唔覺唔覺聯賽已交出十個入球加五個助攻，只是鋒芒被華D搶哂，遲些少應會俾大眾留意到的。
